మోతలతో తెలుగుదేశం పార్టీ వినూత్న నిరసన

రాజమండ్రిలో బ్రాహ్మణి, ఢిల్లీలో లోకేష్ గంటలు డప్పులతో మోత

తెలుగుదేశం పార్టీ అధినేత చంద్రబాబు అరెస్ట్ కు నిరసనగా పార్టీ శ్రేణులు మోత మోగిద్దాం అనే వినూత్న కార్యక్రమం చేపట్టాయి. శనివారం రాత్రి 7 గంటల నుంచి ఐదు నిమిషాల పాటు రాష్ట్రవ్యాప్తంగా తెలుగుదేశం పార్టీ శ్రేణులు మద్దతుదారులు నేతలు శబ్దాలు చేస్తూ నిరసనను వ్యక్తం చేశారు. చంద్రబాబుకు మద్దతు తెలిపేందుకు మోత మోగించాలని ఆయన సతీమణి నారా భువనేశ్వరి, నారా లోకేష్, నారా బ్రాహ్మణి, ఆ పార్టీ రాష్ట్ర అధ్యక్షుడు అచ్చే నాయుడు ప్రజలకు విజ్ఞప్తి చేశారు.

దీంతో తెలుగుదేశం పార్టీ శ్రేణులు భారీగా స్పందించాయి. రాష్ట్రంలోని పలు ప్రాంతాల్లో ప్రజలు రోడ్లపైకి వచ్చి పళ్ళాలు డప్పులు, ఈళలు, హారన్ల శబ్దాలు చేస్తూ మోత మోగించారు. ఈ కార్యక్రమంలో నారా భువనేశ్వరి ,నారా బ్రాహ్మణి, ఢిల్లీలో ఉన్న నారా లోకేష్ గంటలు, డప్పులు మోగించారు. ఈ నిరసన కార్యక్రమంలో పాల్గొన్నవారు తమ వీడియోలు సోషల్ మీడియాలో షేర్ చేశారు.