ఐదు రోజుల కస్టడీకి ఐబొమ్మ రవి

సినిమా పైరసీ కేసుల్లో అరెస్టయిన ఐబొమ్మ నిర్వాహకుడు రవి కస్టడీ వ్యవహారంలో సైబర్ క్రైమ్ పోలీసులు మరో అడుగు ముందుకేశారు. విచారణకు కోర్టు కేటాయించిన మూడు రోజుల సమయం సరిపోదని భావించిన పోలీసులు, కస్టడీని పొడిగించాలని కోరుతూ న్యాయస్థానంలో రివిజన్ పిటిషన్ దాఖలు చేశారు. రవిపై నమోదైన మూడు కేసులకు సంబంధించి ఒక్కో రోజు చొప్పున కోర్టు మూడు రోజుల కస్టడీకి అనుమతించినప్పటికీ, మొత్తం నాలుగు కేసుల్లోనూ సమగ్రంగా విచారించాల్సి ఉందని, ఇందుకు గాను ఐదు రోజుల కస్టడీ అవసరమని పోలీసులు తమ పిటిషన్‌లో కోరారు. ముఖ్యంగా ‘కుబేర’, ‘కిష్కింద పురి’, ‘తండేల్’, ‘హిట్’ వంటి భారీ చిత్రాల పైరసీ వెనుక ఉన్న కీలక సమాచారాన్ని, పూర్తి వివరాలను రవి నుంచి రాబట్టాల్సి ఉందని పోలీసులు కోర్టుకు నివేదించారు. ఈ రివిజన్ పిటిషన్‌పై న్యాయస్థానం తీసుకోబోయే నిర్ణయంపై సర్వత్రా ఆసక్తి నెలకొంది.