ధైర్యానికి.. సాహసానికి మారు పేరు

ఘట్టమనేని శివరామ కృష్ణమూర్తి .. తెలుగు చిత్ర పరిశ్రమలో అడుగు పెట్టాక కృష్ణగా మారారు. హీరోగా 345 సినిమాలు చేసిన కృష్ణ డేరింగ్ అండ్ డాషింగ్ హీరోగా.. సూపర్ స్టార్ గా పాపులారిటీని సాధించి.. అంచలంచెలుగా శిఖరం అంత ఎత్తుకు ఎదిగారు. ఎన్‌.టి.ఆర్, ఏ.ఎన్.ఆర్ కాలం నుంచి చిత్ర పరిశ్రమలో తనకంటూ ఒక ప్రత్యేకమైన శైలిని ఏర్పరచుకొని ధైర్యానికి, సాహసానికి మారుపేరుగా నిలిచారు. సినిమాల పరంగా కృష్ణ చేసిన ప్రయోగాలు మరే హీరో చేయలేదనే చెప్పాలి. ఒక సినిమా కమిటయ్యారంటే.. ఆ సినిమా పూర్తయ్యే వరకు పూర్తి సహకారం అందించడంలో కృష్ణ తర్వాతే ఎవరైనా. కొత్త తరహా కథలు చేయాలన్నా.. కొత్త దర్శకులకు అవకాశాలివ్వాలన్నా.. కొత్త అమ్మాయిని హీరోయిన్‌గా ఇండస్ట్రీకి పరిచయం చేయాలన్నా.. కృష్ణ చేసే సాహసమే అని చెప్పాలి.

విజయశాంతి పాపులారిటీ కృష్ణ చలవే..

తెలుగు చిత్ర పరిశ్రమలో విజయశాంతి లేడీ సూపర్ స్టార్ గా పాపులారిటీని సంపాదించుకున్నారంటే అది కృష్ణ గారి చలువే అని చెప్పాలి. కృష్ణ పరిచయం చేసిన విజయశాంతి సూపర్ స్టార్ మహేష్ బాబు నటించిన సరిలేరు నీకెవ్వరితో 13 ఏళ్ళ తర్వాత రీ ఎంట్రీ ఇవ్వడం పెద్ద సంచలనం. 1964-65లో కృష్ణ హీరోగా నటించిన మొదటి సినిమా తేనెమనసులు. ఈ సినిమా తర్వాత నటించిన గూఢచారి-116తో ఇక సినిమా ఇండస్ట్రీలో వెనుతిరిగి చూసుకోలేదు. దాదాపు నలభై సంవత్సరాలు హీరోగా సుదీర్ఘమైన ప్రయాణం చేసిన కృష్ణ 345 సినిమాల్లో హీరోగా చేశారు. కొన్ని చిత్రాల్లో గెస్ట్ అప్పీరియన్స్ ఇచ్చారు. 1970లో సొంతంగా పద్మాలయా పేరుతో నిర్మాణ సంస్థను ప్రారంభించి ఎన్నో సూపర్ డూపర్ హిట్ చిత్రాలను నిర్మించారు. అంతేకాదు 16 సినిమాలకు దర్శకత్వం కూడా వహించారు.

ప్రయోగాలకు కేరాఫ్‌ అడ్రస్‌..

ప్రయోగాలకు కృష్ణ కేరాఫ్ అడ్రస్ అనడానికి ఎన్నో ఉదాహరణలు ఉన్నాయి. తెలుగులో తొలి జేమ్స్‌బాండ్ సినిమా (గూఢచారి 116), తొలి కౌబాయ్ సినిమా (మోసగాళ్ళకు మోసగాడు), తొలి ఫుల్‌స్కోప్ సినిమా (అల్లూరి సీతారామరాజు), తొలి 70 ఎంఎం సినిమా (సింహాసనం) వంటివి కృష్ణ నటిస్తూ ప్రయోగాలు చేసిన సినిమాలు. ఇక వరుసగా పండంటి కాపురం, దేవుడు చేసిన మనుషులు, పాడిపంటలు, ఈనాడు, అగ్నిపర్వతం వంటి సూపర్ హిట్ సినిమాలతోనూ నాన్ స్టాప్ హిట్స్ అందుకొని నంబర్ వన్ గా నిలబడ్డారు.
ముఖ్యంగా 1976-1985 మధ్య కాలంలో కృష్ణ సినిమా కెరీర్ చాలా అద్భుతంగా సాగింది.

ఎన్నో అవార్డులు.. రివార్డులు

1964 నుంచి 1995 వరకు కృష్ణ సంవత్సరానికి 10 సినిమాలు చొప్పున పదేళ్ళలో 100 సినిమాలు చేసి తిరుగులేని హీరోగా పేరు సంపాదించుకున్నారు. చెప్పాలంటే ఈ విధంగా మరే హీరో చేయలేదు. ఇక రోజులో మూడు షిఫ్టులు పనిచేసి ఒక రోజులో మూడు సినిమాల్లో నటించారు. ఇదీ ఒక రికార్డ్ అని చెప్పాలి. ఇక కృష్ణ ఫిల్మ్‌ఫేర్ సౌత్ జీవిత సాఫల్య పురస్కారం, ఎన్టీఆర్ జాతీయ పురస్కారం, ఆంధ్ర విశ్వవిద్యాలయం గౌరవ డాక్టరేట్, పద్మభూషణ్ పురస్కారాలను అందుకున్నారు. తన తర్వాత తన వారసులను చిత్ర పరిశ్రమకు పరిచయం చేశారు. మహేష్ బాబు, రమేష్ బాబు, కుమార్తె మంజుల, చిన్న అల్లుడు సుధీర్ బాబు సినిమా రంగంలో విజయవంతంగా కొనసాగుతున్నారు. ముఖ్యంగా మహేష్ బాబు, రమేష్ బాబు, కుమార్తె మంజుల నటులుగా, నిర్మాతలుగా తెలుగు చిత్ర పరిశ్రమలో ఎంతో పాపులారిటీని సంపాదించుకున్నారు.

వారసుడిగా మహేశ్‌ బాబు హవా..
ఇక మహేష్ బాబు తండ్రికి తగ్గ తనయుడిగా ఇండస్ట్రీలో తనకంటూ ఒక ప్రత్యేకతమైన స్టార్ ఇమేజ్‌ను సాధించుకున్నాడు. తండ్రి మాదిరిగానే జి.ఎం.బి. ఎంటర్‌టైన్‌మెంట్స్ అనే నిర్మాణ సంస్థ ద్వారా సినిమాలను నిర్మిస్తున్నారు. ఇక సినిమాల విషయంలో మహేష్ బాబు తీసుకునే కొన్ని నిర్ణయాలు తండ్రి సూపర్ స్టార్ కృష్ణనే గుర్తు చేస్తాయి. అందుకు ఉదాహరణగా మురారి, నాని, పోకిరి, బిజినెస్ మాన్, సీతమ్మ వాకిట్లో సిరిమల్లె చెట్టు, శ్రీమంతుడు.. వంటి సినిమాలు చెప్పొచ్చు.