తెలంగాణ విద్యుత్ రంగంలో సరికొత్త రికార్డు

తెలంగాణ రాష్ట్ర విద్యుత్ రంగం మరో అరుదైన మైలురాయిని అధిగమించింది. రాష్ట్ర చరిత్రలో ఇప్పటివరకు ఎన్నడూ లేని విధంగా మంగళవారం ఉదయం 11:01 గంటలకు 18,139 మెగావాట్ల గరిష్ట విద్యుత్ డిమాండ్ నమోదైంది. ఇంతటి భారీ డిమాండ్ ఏర్పడినప్పటికీ, ఎటువంటి అంతరాయం లేకుండా విద్యుత్ సంస్థలు సరఫరాను అత్యంత సమర్థవంతంగా నిర్వహించాయి. ఈ చారిత్రాత్మక విజయంపై డిప్యూటీ సీఎం భట్టి విక్రమార్క హర్షం వ్యక్తం చేశారు . విద్యుత్ శాఖలోని ఉన్నతాధికారులు , క్షేత్రస్థాయి సిబ్బందికి ప్రత్యేక అభినందనలు తెలిపారు.ఈ భారీ విద్యుత్ డిమాండ్ తెలంగాణ సాధిస్తున్న ఆర్థిక పురోగతికి , పారిశ్రామిక వేగానికి నిదర్శనమని ప్రభుత్వం పేర్కొంది. భౌగోళికంగా చిన్న రాష్ట్రమైనప్పటికీ, పెద్ద రాష్ట్రాలతో సమానంగా విద్యుత్ వినియోగాన్ని కలిగి ఉండటం రాష్ట్ర అభివృద్ధి దిశను చాటిచెబుతోంది. ముఖ్యంగా పారిశ్రామిక, వ్యవసాయ , పట్టణాభివృద్ధి రంగాల్లో రాష్ట్రం జెట్ స్పీడ్‌తో దూసుకుపోతోందని, అద్భుతమైన సమన్వయం వల్లే ఈ రికార్డు సాధ్యమైందని డిప్యూటీ సీఎం తన ప్రకటనలో వివరించారు.జాతీయ స్థాయిలో గమనిస్తే, తెలంగాణ తనకంటే భూభాగం , జనాభా పరంగా పెద్దవైన మధ్యప్రదేశ్ , రాజస్థాన్ వంటి రాష్ట్రాల డిమాండ్‌కు దాదాపు చేరువలో నిలిచింది. అంతేకాకుండా పారిశ్రామికంగా ఎంతో పేరున్న పంజాబ్, హర్యానా, ఝార్ఖండ్, ఛత్తీస్‌గఢ్ వంటి రాష్ట్రాల కంటే కూడా తెలంగాణలోనే ఎక్కువ గరిష్ట విద్యుత్ డిమాండ్ నమోదు కావడం గమనార్హం. చిన్న రాష్ట్రమైనా తన సామర్థ్యంలో తెలంగాణ జాతీయ స్థాయిలో మేటిగా నిలుస్తోంది.
రాష్ట్రంలో విద్యుత్ వినియోగ సాంద్రత ఇంతలా పెరగడానికి ఐటీ రంగం, ఔషధ తయారీ , తయారీ రంగాలు,సాగునీటి విస్తరణ వంటి అంశాలు ప్రధాన కారణాలని ప్రభుత్వం గుర్తించింది. ఈ రంగాలు వేగంగా వృద్ధి చెందడం వల్ల విద్యుత్ అవసరాలు కూడా అదే స్థాయిలో పెరుగుతున్నాయి. నాణ్యమైన మరియు నిరంతర విద్యుత్ సరఫరా అందుబాటులో ఉండటం వల్లే రాష్ట్రంలోని కీలక రంగాలు స్థిరమైన వృద్ధిని సాధిస్తున్నాయని భట్టి విక్రమార్క విశ్లేషించారు.
గడిచిన మూడేళ్ల గణాంకాలను పరిశీలిస్తే రాష్ట్ర విద్యుత్ వ్యవస్థ ఎంత వేగంగా విస్తరిస్తోందో అర్థమవుతుంది. 2023-24లో గరిష్ట డిమాండ్ 15,623 మెగావాట్లుగా ఉండగా, 2024-25 నాటికి అది 17,162 మెగావాట్లకు చేరుకుంది. ఇక ప్రస్తుత 2026 మార్చి 3 నాటికి ఏకంగా 18,139 మెగావాట్లకు చేరి, రాష్ట్రం సరికొత్త గరిష్ట దశలోకి ప్రవేశించింది. ఈ గణాంకాలు రాష్ట్ర విద్యుత్ గ్రిడ్ ఎంత పటిష్టంగా ఉందో ప్రతిబింబిస్తున్నాయి.రాబోయే వేసవి కాలంలో విద్యుత్ డిమాండ్ ఇంకా పెరిగే అవకాశం ఉన్నందున, ప్రభుత్వం ముందస్తు ప్రణాళికలతో పూర్తి సిద్ధంగా ఉందని డిప్యూటీ సీఎం ధీమా వ్యక్తం చేశారు. బలమైన గ్రిడ్ వ్యవస్థ, కంట్రోల్ రూమ్ అధికారుల నిరంతర పర్యవేక్షణ , సమర్థవంతమైన నిర్వహణ వల్ల ఎలాంటి సవాళ్లనైనా ఎదుర్కోవడానికి వ్యవస్థ సిద్ధంగా ఉందన్నారు. తెలంగాణ విద్యుత్ రంగం సాధిస్తున్న ఈ పురోగతి ఇతర రాష్ట్రాలకు ఆదర్శంగా నిలుస్తోందని ఆయన కొనియాడారు.