అక్బరుద్దీన్, కేటీఆర్ మధ్య మాటల యుద్ధం

అసెంబ్లీ సమావేశాల రెండో రోజు ఏఎంఐఎం ఎమ్మెల్యే అక్బరుద్దీన్ ఒవైసీ, మంత్రి కేటీఆర్ మధ్య వాగ్వాదం చోటుచేసుకుంది. సభలో ఎమ్మెల్యే అక్బరుద్దీన్ మాట్లాడుతూ రాష్ట్ర ప్రభుత్వం ఉర్దూను రెండో అధికార భాషగా ప్రకటించినప్పటికీ దానికి తగిన న్యాయం చేయడం లేదని విమర్శించారు. తెలంగాణ సచివాలయంలో మసీదు నిర్మాణం పరిస్థితి, హైదరాబాద్‌లోని ఉస్మానియా ఆసుపత్రి పరిస్థితులను కూడా వివరించారు. హైటెక్ సిటీలో శరవేగంగా అభివృద్ధి జరుగుతున్నా… పాతబస్తీలో మాత్రం అభివృద్ధి జరగకపోవడాన్ని ఎమ్మెల్యే ప్రశ్నించారు. చార్మినార్‌ పాదచారుల ప్రాజెక్టు, హైదరాబాద్‌ మెట్రో ప్రాజెక్టుల పూర్తి తేదీపై కూడా వివరణ కోరారు. సీఎం కేసీఆర్, ఇతర మంత్రులను కలవడానికి అనుమతించడం లేదని ఎమ్మెల్యే అక్బరుద్దీన్ ఆరోపిస్తూ, తెలంగాణ ప్రజల ప్రయోజనాల కోసం కిందిస్థాయి సిబ్బందిని కూడా కలవడానికి సిద్ధంగా ఉన్నారని పేర్కొన్నారు. బీఏసీ సమావేశానికి హాజరుకాకుండా మాట్లాడడం సరికాదని మంత్రి కేటీఆర్ ఘాటుగా కౌంటర్ ఇచ్చారు. కేవలం ఏడుగురు సభ్యులతో కూడిన ఎంఐఎం సెషన్‌లో మాట్లాడేందుకు ఎక్కువ సమయం తీసుకుంటోందని, నిర్ణీత సమయాలను పాటించాలని, సభలోని నిబంధనలను పాటించాలని సూచించారు.