అధిష్టానం ఆదేశిస్తేనే రాజీనామా చేస్తా

గోషామహల్ ఎమ్మెల్యే రాజాసింగ్ ఇటీవల బీజేపీ ప్రాథమిక సభ్యత్వానికి రాజీనామా చేశారు. పార్టీ తీసుకున్న కీలక నిర్ణయాలపై వ్యతిరేకత వ్యక్తం చేస్తూ ఆయన ఈ నిర్ణయం తీసుకున్నారు. ముఖ్యంగా తెలంగాణ బీజేపీ అధ్యక్ష పదవికి తనను పరిగణనలోకి తీసుకోకుండా మాజీ ఎమ్మెల్సీ ఎన్. రామచందర్ రావును నియమించడంపై ఆయన అసంతృప్తిని వ్యక్తం చేశారు. తన రాజీనామా లేఖలో పార్టీ నేతలపై, ముఖ్యంగా కొంతమంది కేంద్ర నాయకత్వాన్ని తప్పుదోవ పట్టిస్తున్నారనే ఆరోపణలు చేయడం గమనార్హం. పార్టీని క్రమశిక్షణలో ఉంచే నిబద్ధత కింద, బీజేపీ అధిష్ఠానం రాజీనామాను ఆమోదించినట్లు పార్టీ వర్గాలు వెల్లడించాయి. అయితే, ఎమ్మెల్యే పదవికి మాత్రం రాజాసింగ్ రాజీనామా చేయలేదు. మొదట కమలం గుర్తుపై గెలిచినందున ఎమ్మెల్యే పదవికి కూడా రాజీనామా చేస్తానని ప్రకటించినా, తాజాగా ఆయన వ్యాఖ్యలు తటస్థంగా మారినట్లుగా కనిపిస్తున్నాయి. “అధిష్ఠానం ఆదేశిస్తేనే రాజీనామా చేస్తాను” అని ఆయన చేసిన వ్యాఖ్యలు రాజకీయ విశ్లేషకుల దృష్టిని ఆకర్షిస్తున్నాయి. ఉప ఎన్నిక వస్తే అభ్యంతరం లేదని, గోషామహల్ నియోజకవర్గంలో పార్టీ టికెట్ ఎవరికి ఇస్తుందో చూస్తానని కూడా తెలిపారు. ఈ ప్రకటనల నేపథ్యంలో, ఆయన భవిష్యత్ కార్యాచరణ పూర్తిగా బీజేపీ హైకమాండ్ నిర్ణయంపై ఆధారపడినట్లుగా కనిపిస్తోంది. అంతేకాక, బీజేపీకి రాజీనామా చేసిన నేపథ్యంలో ఇతర పార్టీల్లోకి వెళ్తారన్న ప్రచారాన్ని రాజాసింగ్ ఖండించారు. తనకు హిందుత్వమే ప్రాధాన్యత అని, ఎంఐఎంతో పొత్తున్న కాంగ్రెస్ వంటి పార్టీల్లో చేరే ప్రసక్తే లేదని తెలిపారు. నరేంద్ర మోదీ, అమిత్ షాలకు ప్రచారం చేసే విధంగా పనిచేస్తానని పేర్కొన్నారు. ఆదివారం జరిగిన లాల్ దర్వాజ బోనాల ఉత్సవాల్లో పాల్గొన్న ఆయన, మీడియాతో మాట్లాడుతూ, తాను బీజేపీ సిద్ధాంతాలను నమ్ముతాననీ, చివరి శ్వాస వరకు హిందుత్వం కోసం పోరాడుతానని వెల్లడించారు. రాజాసింగ్ తాజా వ్యాఖ్యల ప్రకారం, ఆయన పూర్తిగా బీజేపీకి వ్యతిరేకంగా మలుపు తీయలేదని స్పష్టమవుతోంది. మొదట పార్టీపై తీవ్ర విమర్శలు చేసినా, ప్రస్తుతం అధిష్ఠానాన్ని గౌరవిస్తూ మాట్లాడడం, రాజకీయంగా తిరిగి బీజేపీలోకి వచ్చే అవకాశాలు ఉన్నట్లు రాజకీయ పరిశీలకులు భావిస్తున్నారు. కాబట్టి, రాజాసింగ్ రాజకీయ భవిష్యత్‌పై ఇంకా స్పష్టత రాలేదని, ఆయన తదుపరి నిర్ణయాలు పార్టీ నాయకత్వం తీసుకునే చర్యలపై ఆధారపడి ఉంటాయని చెప్పవచ్చు.