భారతీయ ఖైదీలు విడుదల.. ఖతార్‌కు ప్రధాని మోదీ
యూఏఈ పర్యటన ముగిసిన తర్వాత ప్రధాని నరేంద్ర మోదీ బుధవారం ఖతార్‌లోని దోహా వెళ్లనున్నట్లు విదేశాంగ కార్యదర్శి వినయ్ మోహన్ క్వాత్రా ఈరోజు తెలిపారు. ఈ పర్యటన మొత్తం సంబంధాలను మరింత పటిష్టం చేసుకునే మార్గాలను చర్చించే లక్ష్యంతో ఉందని క్వాత్రా చెప్పారు. గూఢచర్యం కేసులో ఖతార్‌లో జైలులో ఉన్న ఎనిమిది మంది భారతీయ నావికాదళ సిబ్బంది స్వదేశానికి చేరుకున్న రోజున ప్రధాని మోదీ ఖతార్ పర్యటన ప్రకటన కూడా వచ్చింది. 2023 అక్టోబర్‌లో 8 మంది భారతీయులకు ఖతార్ మరణశిక్ష విధించింది. వారిలో ఏడుగురు ఇండియా చేరుకోగా, మరో వ్యక్తి త్వరలోనే చేరుకుంటారు.
ఖతార్‌లో అరెస్టయిన భారతీయులను విడిపించడానికి కేసు నిర్వహణను ప్రధాని మోదీ స్వయంగా పర్యవేక్షించారని విదేశాంగ కార్యదర్శి తెలిపారు. ఖతార్‌లో 8.4 లక్షల మంది భారతీయులు నివసిస్తున్నారు. ఇరువురు నేతలు ద్వైపాక్షిక సంబంధాలను మరింతగా బలోపేతం చేసుకోవడాన్ని పరిశీలిస్తారని క్వాత్రా తెలిపారు. 2022 ఆగస్టులో అరెస్టయిన భారతీయులను విడుదల చేయాలని ఖతార్ ఎమిర్ తీసుకున్న నిర్ణయాన్ని భారతదేశం అభినందిస్తోందని విదేశీ వ్యవహారాల మంత్రిత్వ శాఖ ఒక ప్రకటనలో తెలిపింది.
భారత నావికాదళ మాజీ సిబ్బంది గూఢచర్యం ఆరోపణలను ఎదుర్కొన్నారు కానీ ఖతార్ అధికారులు కానీ, న్యూఢిల్లీ గానీ వారిపై ఆరోపణలను బయటకు వెల్లడించలేదు. ఎనిమిది మంది భారతీయ పౌరులు కెప్టెన్ నవతేజ్ గిల్ (రిటైర్డ్), కెప్టెన్ సౌరభ్ వశిష్ట్ (రిటైర్డ్), కమాండర్ పూర్ణేందు తివారీ (రిటైర్డ్), కమాండర్ అమిత్ నాగ్‌పాల్ (రిటైర్డ్), కమాండర్ ఎస్‌కె గుప్తా (రిటైర్డ్), కమాండర్ బికె వర్మ (రిటైర్డ్), మరియు కమాండర్ సుగుణాకర్. పాకాల (రిటైర్డ్), నావికుడు రాగేష్ వారిలో ఉన్నారు. కమాండర్ తివారీ తిరిగి దోహాలోనే ఉన్నారు. త్వరలో భారతదేశానికి తిరిగి వచ్చే అవకాశం ఉందని వార్తా సంస్థ PTI నివేదించింది.
అక్టోబర్ 26న, నేవీ అధికారులను ఖతార్ కోర్ట్ ఆఫ్ ఫస్ట్ ఇన్‌స్టాన్స్ మరణశిక్ష విధించింది. డిసెంబర్ 28న, గల్ఫ్ దేశంలోని అప్పీల్ కోర్ట్ ఉరిశిక్షను తగ్గించింది. 3 నుండి 25 సంవత్సరాల వరకు జైలు శిక్ష విధించింది. గత ఏడాది డిసెంబర్‌లో, దుబాయ్‌లో జరిగిన COP28 సమ్మిట్‌లో భాగంగా ప్రధాని మోదీ ఖతార్ ఎమిర్ షేక్ తమీమ్ బిన్ హమద్ అల్-థానీని కలుసుకున్నారు. ఖతార్‌లోని భారతీయ సమాజ శ్రేయస్సు గురించి చర్చించారు. భారతీయుల విడుదలకు సంబంధించి ఖతార్ అధికారులతో జరిగిన చర్చల్లో జాతీయ భద్రతా సలహాదారు అజిత్ దోవల్ కీలక పాత్ర పోషించారు.