ఈ నెల 9న అమరావతి రాజధాని కేసు విచారణ
ఆంధ్రప్రదేశ్ మూడు రాజధానులు వ్యవహారంలో దాఖలైన పిటీషన్లపై సుప్రీంకోర్టు మే 9న విచారణ చేపట్టనుంది. మూడు రాజధానుల నిర్ణయాన్ని తప్పుపడుతూ అమరావతినే రాజధానిగా కొనసాగించాలంటూ ఆంధ్ర ప్రదేశ్ రాష్ట్ర హైకోర్టు ఇచ్చిన తీర్పును సవాలు చేస్తూ ప్రభుత్వం దాఖలు చేసిన కేసులో ఇప్పటికే మధ్యంతర ఉత్తర్వులు జారీ చేసిన విషయం తెలిసిందే. హైకోర్టు తీర్పులోని ఏడు అంశాల్లో ఐదు అంశాలపై స్టే విధించిన సుప్రీంకోర్టు మిగతా రెండు అంశాలపై ప్రతివాదుల వాదనలను విన్న తర్వాతనే తుది నిర్ణయం వెలువరిస్తామంది.
ఈ క్రమంలో కేసు తదుపరి విచారణను జూలై 11 కు వాయిదా వేసింది. కేసును మొదటి నుంచి విచారణ జరుపుతున్న జస్టిస్ జోసఫ్, జస్టిస్ నాగరత్న ధర్మాసనం తర్వాత దశలో కేసు విచారణ చేపట్టేందుకు ఆసక్తి చూపలేదు. అయితే జూన్ 17న జస్టిస్ జోసెఫ్ పదవీ విరమణ చేయనున్నారు. ఈ క్రమంలో మరో కొత్త ధర్మాసనం ముందుకు కేసు చేరుకుంటోంది. అంటే కథ మళ్ళీ మొదటికి వస్తుంది. కేసు విచారణను త్వరగా చేపట్టాలంటూ రాష్ట్ర ప్రభుత్వం తరఫున న్యాయవాదులు ధర్మాసనం ఎదుట పలుమార్లు ప్రస్తావించారు. సరిగ్గా ఇదే సమయంలో మే 9 నాటి కేసుల జాబితాలో ఈ కేసు 11వ స్థానంలో కనిపించింది. పైగా ఈ ధర్మాసనంలో జస్టిస్ జోసెఫ్, జస్టిస్ నాగరత్నతో పాటు జస్టిస్ ఆహాసనుద్దీన్ అమనుల్లా కూడా ఉన్నారు.
ఆ రోజు కేసులో మిగిలిన అంశాలపై పూర్తిస్థాయిలో విచారణ జరుపుతారా లేక ప్రతివాదులుగా ఉన్న అమరావతి రైతుల్లో కొందరు చనిపోయినందున వారి స్థానంలో వారసులను ప్రతివాదులుగా చేర్చే అంశానికి మాత్రమే పరిమితం అవుతారా అన్న విషయం తేలాల్సి ఉంది. ముందుగా నిర్ణయించిన ప్రకారం కేసులోని మిగతా అంశాలపై జూలై 11న విచారణ జరుగుతుందని మే 9న జరిగే విచారణ కేవలం చనిపోయిన ప్రతివాదుల స్థానంలో వారి వారసులను చేర్చటం మాత్రమే జరుగుతుందని న్యాయవాదులు చెబుతున్నారు.
ఇదిలా ఉంటే ఆంధ్రప్రదేశ్ పాలన రాజధానిని విశాఖపట్నాని తరలించేందుకు సన్నాహాలు చేస్తున్న రాష్ట్ర ప్రభుత్వం మే 9 జరిగే విచారణలో చనిపోయిన ప్రతివాదుల స్థానంలో వారి వారసులను చేర్చడంతో పాటు కేసులో ఉన్న మిగతా పెండింగ్ అంశాలపై పూర్తిస్థాయిలో విచారణ జరపాలని పట్టుబట్టే అవకాశం ఉంది. తద్వారా వీలైనంత త్వరగా వివాదాన్ని పరిష్కరిస్తే తాము పాలనా రాజధాని తరలింపు విషయంలో ఒక నిర్ణయానికి వస్తామని సుప్రీంకోర్టుకు తెలియజేయనుంది. ఆ మేరకు సీనియర్ న్యాయవాదులతో వాదనలు వినిపించేందుకు రాష్ట్ర ప్రభుత్వం సన్నాహాలు చేస్తుంది.
