ముందు మీ సంగతి చూసుకోండి.. పాకిస్తాన్‌కు కేజ్రీవాల్ వార్నింగ్
రాజకీయనాయకులు అవకాశాలను ఎలా సద్వినియోగం చేసుకుందామా అని ఎదురు చూస్తుంటారు. కొన్నిసార్లు వాటి వల్ల డిఫెన్స్‌లో పడినప్పటికీ, మైలేజ్ కోసం ప్రయత్నాలు చేస్తూనే ఉంటారు. ఇవాళ ఢిల్లీలో ఓటు హక్కు వినియోగించుకున్న కేజ్రీవాల్ ట్వీట్‌కు పాక్ మంత్రి చేసిన ట్వీట్ దేశ వ్యాప్త రచ్చకు కారణమైంది. సోషల్ నెట్‌వర్కింగ్ ప్లాట్‌ఫామ్ ‘ఎక్స్’లో తన పోస్ట్ ద్వారా పాకిస్తాన్ మంత్రిపై విరుచుకుపడ్డారు. అరవింద్ కేజ్రీవాల్ తన తండ్రి, భార్య మరియు పిల్లలతో కలిసి దేశ రాజధాని ఢిల్లీలో ఈవాళ ఓటు వేశారు. ఓటు వేసిన తర్వాత X లో ఫోటోను షేర్ చేశారు.
“నా తండ్రి, భార్య, నా పిల్లలు ఇద్దరూ ఓటు వేశారు. మా అమ్మ చాలా అనారోగ్యంతో ఈ రోజు రాలేకపోయారు. నేను ద్రవ్యోల్బణం, నిరుద్యోగానికి వ్యతిరేకంగా ఓటు వేశాను” అని కేజ్రీవాల్ పోస్ట్ చేశారు. పాకిస్తాన్ నాయకుడు ఫవాద్ హుస్సేన్ చౌదరి- మిస్టర్ కేజ్రీవాల్ పోస్ట్‌ను ఉటంకిస్తూ – “శాంతి, సామరస్యం ద్వేషం, తీవ్రవాద శక్తులను ఓడించాలి” అని అన్నారు. దీనిపై ఢిల్లీ ముఖ్యమంత్రి స్పందిస్తూ.. భారతదేశ అంతర్గత విషయంలో జోక్యం చేసుకునే బదులు ఫవాద్ హుస్సేన్ తన దేశంలోని పేదరికంపై దృష్టి పెట్టాలని కోరారు. “మా సమస్యలను పరిష్కరించడంలో మాకు పూర్తి సామర్థ్యం ఉంది. పాకిస్తాన్ పరిస్థితి ఇప్పుడు చాలా దయనీయంగా ఉంది, కాబట్టి మీరు మీ దేశాన్ని జాగ్రత్తగా చూసుకోండి” అని ఆయన అన్నారు.
‘ఎన్నికలు మా అంతర్గత విషయం. ఉగ్రవాదానికి అతిపెద్ద స్పాన్సర్‌ల జోక్యాన్ని భారత్ సహించదు’ అని ఆయన మరో పోస్ట్‌లో పేర్కొన్నారు.
మరోవైపు అరవింద్ కేజ్రీవాల్‌కు పాకిస్థాన్ నుంచి భారీ మద్దతు ఉందని కేంద్ర మంత్రి కిరణ్ రిజిజు వ్యాఖ్యానించారు.
“రాహుల్ గాంధీ మాత్రమే కాదు, అరవింద్ కేజ్రీవాల్‌కు పాకిస్తాన్‌లో భారీ మద్దతు లభించిందని నేను చెప్తాను” అని రిజిజు పోస్ట్ చేశారు.
ఆరో ఫేజ్‌లో భాగంగా, బీహార్, బెంగాల్‌లో ఎనిమిది, ఢిల్లీలో ఏడు, హర్యానాలో 10, జార్ఖండ్‌లో 4, ఉత్తరప్రదేశ్‌లో 14, జమ్మూ & కాశ్మీర్‌లోని చివరి స్థానమైన అనంత్‌నాగ్-రాజౌరిలో ఈరోజు పోలింగ్ జరిగింది. జూన్ 1న ఎన్నికల చివరి దశ ముగిసిన తర్వాత జూన్ 4న ఓట్ల లెక్కింపు జరగనుంది.
