భారతీయ మేధస్సు అమోఘం : బుర్జ్ ఖలీఫా రూపశిల్పి

ప్రపంచంలోనే అత్యంత ఎత్తైన కట్టడం బుర్జ్ ఖలీఫా వంటి అద్భుత నిర్మాణాల వెనుక భారతీయుల అంకితభావం, కఠోర శ్రమ దాగి ఉన్నాయని ఎమార్ గ్రూప్ వ్యవస్థాపకుడు మొహమ్మద్ అలబ్బార్ కొనియాడారు. అబుదాబిలో జరిగిన ‘మేక్ ఇట్ ఇన్ ది ఎమిరేట్స్’ వేదికగా ఆయన భారతీయ ప్రతిభను ఆకాశానికెత్తారు. ప్రపంచం మొత్తం పని గంటల కోసం గడియారం వైపు చూస్తుంటే, భారతీయ నిపుణులు మాత్రం అర్ధరాత్రి ఒంటి గంటకైనా అందుబాటులో ఉండి సమస్యలను పరిష్కరిస్తారని ఆయన ప్రశంసించారు. ఈ అసాధారణమైన పనితీరు, బాధ్యతాయుతమైన వైఖరి కారణంగానే తాను నియామకాల్లో భారతీయులకే తొలి ప్రాధాన్యత ఇస్తానని ఆయన స్పష్టం చేశారు. 2008 ఆర్థిక మాంద్యం, కోవిడ్ వంటి గడ్డు కాలంలోనూ ఎమార్ గ్రూప్ నిలదొక్కుకోవడానికి భారతీయ శ్రామిక శక్తే ప్రధాన కారణమని ఆయన గుర్తు చేసుకున్నారు. మారుతున్న ప్రపంచంలో ఇంతటి స్థిరమైన, నిరంతర వృద్ధి సాధిస్తున్న దేశం మరొకటి లేదని ఆయన అభిప్రాయపడ్డారు. అత్యుత్తమ నిర్మాణ నైపుణ్యాలు, ముందస్తుగా ప్రమాదాలను అంచనా వేయగల సామర్థ్యం భారతీయుల సొంతమని ఆయన కొనియాడారు. భారతీయ ప్రతిభను ప్రోత్సహించే దిశగా ఎమార్ గ్రూప్ ఇప్పటికే కీలక అడుగులు వేసింది. రాజస్థాన్‌లోని రాఫెల్స్ యూనివర్సిటీతో ప్రత్యేక భాగస్వామ్యం కుదుర్చుకుని, ప్రతి ఏటా ప్రతిభావంతులైన 20 మంది విద్యార్థులను ఎంపిక చేసి దుబాయ్, యూరప్ వంటి అంతర్జాతీయ కార్యాలయాల్లో ఉపాధి కల్పిస్తోంది.