కార్గిల్ త్యాగాలు మరువలేం-పవన్‌కళ్యాణ్
జనసేన అధినేత పవన్ కళ్యాణ్ కార్గిల్ విజయ్ దివస్‌ను పునస్కరించుకుని సైనికుల ధైర్యసాహసాల గురించి, వారి త్యాగాలను గుర్తు చేసుకుంటూ ట్వీట్ చేసారు. 1999 జులై 26న భారత సైనికులు శత్రుమూకలను తరిమికొట్టి కార్గిల్ కొండలపై మువ్వన్నెల పతాకాన్ని ఎగురవేశారని… ఆ రోజును మరువలేమన్నారు. అయితే ఈ విజయ సాధనలో 527 మంది సైనికులు వీర మరణం పొందడం గుండెలను పిండేసే సంఘటన అని బాధపడ్డారు. . ఈ పోరాటంలో ప్రాణాలను అర్పించిన భారత సైనికులకు శిరస్సు వంచి వందనం చేస్తున్నానని, వారి ధీరత్వానికి జోహార్లు అర్పిస్తున్నానని ఉద్వేగంతో ప్రసంగించారు. ఈరోజు భారత సైనికుల ధైర్య సాహసాలు , వీరోచిత పోరాటాలు చూసి ప్రపంచమే ఆశ్చర్యపడిన రోజని, సైనికుల వీరుల త్యాగాల ఫలితమే కార్గిల్ విజయం అనీ, అందుకే మనం కార్గిల్ విజయ్ దివస్ జరుపుకుంటున్నామని అన్నారు.
శరీరాన్ని కొరికే చలిలో ప్రతికూల పరిస్థితులు , ప్రతికూల వాతావరణంలో శత్రువులకు ఎదురెళ్లితే ప్రాణాలు పోవడం ఖాయమని తెలిసినా దేశం కోసం , కోట్లాది మంది ప్రజల భద్రత కోసం శత్రు మూకలతో పోరాడి మన దేశ భూభాగాన్ని రక్షించిన వారి త్యాగాన్ని మనం ఎంత కీర్తించినా , మరెంత పొగిడినా తక్కువేనన్నారు పవన్ కల్యాణ్. శత్రువులను దేశం నుండి తరిమేయడానికి భారత సైనికులు చూపిన తెగువ , పోరాటం గురించి దేశంలో ఉన్న ప్రతి ఒక్కరం తెలుసుకోవాలని, వారి త్యాగాన్ని గుర్తు పెట్టుకుని నివాళులు సమర్పించాలన్నారు. ఈ విజయ భేరిలో నినదించిన ప్రతి సైనికులకు… వారి కుటుంబాలకు భారత జాతి ఎల్లప్పుడూ రుణపడి ఉంటుందని… అమరుల త్యాగాలను స్మరించుకుంటూనే ఉంటుందన్నారు పవన్ కల్యాణ్.
